Einhverfa.is

Umsjónarfélag einhverfra var stofnað 1977 og í því eru foreldrar, aðstandendur, fagfólk og allir þeir sem bera hag þeirra sem eru með einhverfu og þær fatlanir sem flokkast undir einhverfuvíddina (autistic spectrum) fyrir brjósti. Þær fatlanir sem flokkast undir einhverfuvíddina eru þær fatlanir sem falla undir alþjóðagreininguna ICD10.

Starfsemi félagsins hefur að mestu beinst að því að bæta þjónustu við fólk haldið einhverfu og skyldum fötlunum. Mikil áhersla hefur verið lögð á að taka virkan þátt í mótun þjónustu fyrir þennan hóp. Nefnd á vegum félagsmálaráðuneytis sem fjallaði um framtíðarskipulag á þjónustu fyrir einhverfa lauk störfum í byrjun árs 1996. Tveir fulltrúar félagsins sátu í þeirri nefnd. Mikilvægt er að foreldrar og aðrir aðstandendur standi vörð um rétt barna sinna og láti til sín taka. Ef þú ert ekki sáttur við þá þjónustu sem barnið þitt fær, hvetjum við þig til að hafa samband við félagið, hvar sem þú ert á landinu.

Félagið hefur lagt ríka áherslu á fræðslu- og kynningarstarfsemi og á töluvert af bókum og nokkrar myndbandsspólur sem hægt er að fá lánaðar. Félagið fær fréttablöð frá systursamtökum á Norðurlöndunum og er áskrifandi að nokkrum blöðum um einhverfu.

Eitt af markmiðum félagsins er að vera vettvangur fyrir gagnkvæman stuðning aðstandenda einhverfra, enda er mjög mikilvægt að hittast, bera saman bækur sínar og veita hvert öðru stuðning. Þú ert ekki ein(n). Hafðu samband, við getum orðið hvert öðru að liði.